如果阿囡講話想去睇星星，香港啲家長可能會話好呀好呀做晒啲功課測驗100分考完DSE上到大學First Hon畢業搵到份好工之後帶你去吓，不過台灣呢個老竇就唔同喇，囡囡話鍾意睇星，佢立馬起咗間玻璃屋畀佢呀！

人哋話阿爸同個女係上世情人似乎係真㗎，你睇呢個阿爸浪漫到！呢位囡囡除咗鍾意星星，仲好鍾意竹節蟲，於是呢個萬能老竇就自己設計咗呢間三角型屋，下層養蟲蟲上層睇星星，一次過滿足兩個願望～

呢位老竇原本係做生態農場嘅，囡囡由細到大都喺大自然環境生活，而呢間玻璃屋日頭可以睇蝴蝶，夜晚可以睇星，講到呢度係咪覺得夢幻到唔似人類世界呢，呢種童年生活係由細到大都補充練習無間做嘅香港小朋友係好難想像到㗎喇。

台灣媒體like爆呢間玻璃屋仔，好多小朋友都好想去呢間屋企睇星星，於是呢個爸爸話會起夠七隻色，變成一排彩虹玻璃屋，免費畀99個弱勢家庭嘅小朋友咁嚟住話呀～

毛毛唔使要養到蟲同埋睇到星星嘅屋喇，我淨係要間屋就得㗎喇，有冇一位善心嘅老竇可以送間畀毛毛呀。

圖片來源：蘋果日報、中時電子報、親子部落_月老祠