細路仔驚輸在起跑線，其實汪星人都一樣驚㗎！今時今日，淨係識對主人揈尾畀hand hand賣萌係唔夠㗎，所以咪要訓練到自己十項全能咩都識做囉！

就好似之前同大家介紹過隻家務小汪子咁，又識拎報紙又識幫手洗車，掂呀！不過要訓練到狗狗咁醒目，真係冇返三五七年時間都訓練唔到啵！

話說美國有個4歲嘅細路哥Lincoln因為有花粉症，春天唔出得街街玩，佢爸爸媽咪就買咗隻汪星人陪佢留喺屋企啦～

Lincoln有日毛毛聊聊，諗住不如訓練下狗狗啦，佢叔叔知道咗就教佢可以上YouTube睇片學下點訓練狗狗，點知Lincoln 4歲人仔已經頓悟到「想訓練狗狗，唔使用劍嘅，用YouTube就得啦」嘅大道理，直接畀部機佢隻狗狗睇呀！嗚呀，係喎，其實又使乜自己學完再教狗狗呢，叫佢自己學下點聽指令咪既方便又快捷囉！

呢個故事唔止好有親切感，仲好大條道理呀！毛毛明喇，下次腦細叫毛毛幫佢搵資料，直接畀部機佢自己睇咪得囉！

封面圖片、資料來源：The Ball Brothers

回帶：【十項全能】咩都識做嘅汪星人