「好心你咁大個人就唔好掛住打機啦！」

「你又打機呀，有時間增值下自己好過啦！」

「做人有意義啲啦，打少陣機得唔得？」

喺人哋眼中，打機係嘥時間，浪費人生嘅活動。不過你心諗：「細個又話要畀心機讀書，大個又話要畀心機搵錢，咁遊戲機呢樣嘢，到底發明出嚟係幾時玩？」

對男人嚟講，打機，係精神支柱，寧願瞓少啲，都要打返舖機。其實打完機成個人反而仲精神咗，就好似女人做完Facial咁，完全放鬆晒。

因為打機嗰陣，你唔使諗第日買唔買到樓、唔使睇腦細面口，更加唔使諗拖唔拖到女神隻手。

行前定行後、射波定傳波，你自己決定晒，就算Game Over，都可以重頭嚟過。

打機唔係嘥時間，而係喺忙碌中體驗自由。

尤其成班巴打OT完返到屋企，第一時間喺WhatsApp group問：「打機？」然後成班狗衝話即刻開機。雖然只係玩半個鐘至個幾鐘，唔再好似以前咁通頂狂打，但隔住個mon，你都依然會感受到友情係幾咁可貴，呢班堅・兄弟係幾咁熱血。

古乳有暈：「休息係為咗行更遠嘅路。」，咁「打機，都係為咗有返啲生活態度。」

女人唔補好易老，男人唔打機，連生活都冇。