2016年05月26日 星期四
【齊齊下海】台灣小學搞海底畢業禮
諗返起細個讀書時候嘅畢業禮，都係聽校長講啲年年一樣嘅嘢，睇埋啲年年一樣嘅表演，然後上台拎證書，影張相，咁就完咗……睇咗咁多年，你唔悶毛毛都唔悶啦！如果香港啲學校都可以好似呢間台灣小學嘅畢業禮咁搞下新意，咁就好喇！反正689都話lung廚時間要去游水啦，嗱而家由小學開始學定潛水就啱晒喇！
係呀，你冇睇錯，呢間小學真係將成個畢業禮由禮堂搬咗落海底，連紅地氈都有，真係好有心思㗎！
成班小學生，連埋校長、老師、家長，齊齊下海，呢個畫面何其壯觀呀真係！如果想致詞嘅話都唔使擔心淨係得「blue blue blue」講不出聲嘅，一早印晒出嚟做標語，想知我講咩？自己睇啦喂！今次真係濕L晒都唔使驚呀！
其實呢個海底畢業禮已經係第三年舉行㗎喇，因為間小學位於台灣綠島，而綠島又四面環海喎，個校長想班學生可以接觸海洋，於是就搞咗呢個海底畢業禮喇！你又唔使驚佢哋做唔到海底奇兵喎，事關每逢畢業禮之前，學校都會同班學生上潛水堂，落水嗰陣又會有專業團隊傍住喺隔離，所以唔使擔心㗎～喂可唔可侵埋人魚樂毛窮班蝦兵蟹將玩啫？blue blue blue！
