唔怕話你知，其實毛毛屋企收埋咗好多個BB㗎…講緊嘅係BB高達呀！

自己一手一腳咁組裝唔同部件，上色……睇住個bb慢慢咁長大，真係諗起都濕濕哋呀……對眼。毛毛夠膽講，砌模型，絕對係男人嘅浪漫！不過日本有個網友就仲堅，事關佢唔係砌模型咁簡單，而係用個模型框砌咗個巨型高達出嚟呀！

平時我哋砌完模型，啲框通常都係掉咗佢就算。但係呢個神人就唔同呢，夠晒環保，keep起晒啲框不特止，仲分埋顏色?呀！

跟住落嚟要做啲咩，相信都唔使毛毛多講啦，好似平時砌模型咁將佢哋放晒上去，咁就搞掂㗎喇！呢位網民都話佢只係用咗40個鐘嚟整咋嘛，嗯，其實唔難吖！

不過要整呢個模型框高達出嚟，首先你要有好多時間，仲要有好多錢……嗯，毛毛都係玩返自己啲BB算。

圖片來源、資料來源：hirotyun1000/twitter