小日本真係好可惡呀，平時啲嘢又靚又正，搞到毛毛年年都要過日本用錢嚟令佢哋下架就唔再講啦，連網上購物個客服都咁好態度，喂你哋玩晒啦。

是咁的，話說前幾日有個日本網民post咗張相，話唔知點解件貨送到嚟會變咗隻黑貓喎～唔通係第二間黑貓送貨公司嚟搶生意？

少年你想太多了，其實只不過係主子鍾意呢個箱，想據為己有啫。之但係個客服居然好認真咁回答返佢呀！

嗱根據毛毛多年睇日本愛情動作片嘅心得，佢呢段嘢9估應該係話：「多謝你使用本公司嘅服務呀，不過我哋冇賣貓咪㗎……所以好有可能係件貨開封之後混入去嘅，麻煩你再確認一下！隻貓咪好可愛呀嗚哇……」

難得見到有人回自己post，呢個日本網民亦都好快咁跟手回咗個客服post，話睇怕隻貓都係開封之後自己走入個箱度，仲話佢好鍾意?！以為件事就咁就完啦，點知個客服神又回覆佢呀！

「如果係開封之後先走入去嘅，本公司係唔會退貨㗎，請你同貓咪要開開心心咁生活落去！」嗚哇，雖然話真心難求，但係真心得嚟仲要咁有愛嘅客服去邊度搵吖真係。呢啲咪就係堅嘅待客之道囉！毛毛得閒都要過去日本跟佢哋學下嘢先！

圖片來源：、資料來源：uo_kzm/twitter