鷸蚌相爭，漁人得利嘅故事，毛毛細細個就聽過啦～唔好以為淨係古代先有呀，其實而家有咁硬頸嘅雀仔！

不過今次主角就唔係鷸同蚌，而係兩隻雀喇～睇見佢哋雙方咬實條肉肉爭持不下，相信呢場爭霸戰會愈演愈烈呀！

聽講左邊嘅參賽者雀仔同右邊嘅參賽者阿雀已經嘴對嘴僵持咗幾粒鐘㗎喇啵，但仍然難分勝負呀！

真係估唔到雀仔同阿雀持久度咁驚人，仲相當之硬呀下，條頸！死都唔肯放口！拍片嘅花生友見個天愈嚟愈黑，驚佢哋贏到條肉但搞到冷親傷風就唔好啦，於是就用tissue幫佢哋冚被喇。

但係雀仔同阿雀都係爭持不下，雙方都唔肯讓步！出得嚟行，都係搵餐食啫，花生友為咗勸交，就奉獻咗私人珍藏嘅幾條肉肉擺喺佢哋嘴邊，點知佢哋都不為所動，只係為爭奪對方口中嗰條肉肉而戰！

睇嚟毛毛睇小咗佢哋！呢場根本唔係肉肉爭奪戰咁簡單！佢哋係為咗尊嚴同榮耀而戰，呢份情操真係好高尚！雀仔、阿雀，毛毛respect你哋！

封面圖片、資料來源：JigMagic／Youtube