去旅行玩，唔可以留低垃圾就係人都知啦，不過都有唔少人會想拎走啲嘢當係留個紀念，好似去沙灘執下貝殼、裝走啲沙咁～最近美國就有個細路仔去國家公園（Sequoia and Kings Canyon National Parks）玩嘅時候，偷偷地執咗個松果返屋企喇～

但係個小朋友後來唔知係因為畀爸爸媽咪鬧，定係良心發現呢，竟然寄返粒松果去國家公園，仲寫咗封信道歉呀。小朋友話，希望工作人員可以幫佢放返粒松果去原來棵樹度～真係好有童真呀～

公園就話喇，帶走松果係違反規定㗎，因為動物需要食物、園區需要種子同植物，而啲松果同其他植物呢，就會成為土壤養分，成個環境是但冇咗一部份都唔得掂㗎。

公園講嘅嘢唔止好有中學地理堂嘅親切感，仲好有大道理！咁多位小朋友，下次有機會去郊遊，記得唔好亂咁帶大自然嘅東東走呀～

封面圖片、資料來源： Sequoia and Kings Canyon National Parks

＜乖細路系列＞

【呢啲咪身教囉】媽咪帶埋囝囝星期日一早起身打掃馬路

【係愛呀哈利】小妹妹同垃圾叔叔成為好朋友 生日專程請佢食蛋糕