最近外國有位網民發現，每日都會有個陌生細路走嚟佢屋企個車房，偷偷地攬完自己養嘅狗仔之後就會好快咁跑走。咩樹咩樹，乜咁似啲恐怖片情節嘅喂！

佢將呢段閉路電視嘅片段放咗上facebook，希望一班摩擦力很強嘅網友可以幫幫佢，終於皇天不負李克勤，所有謎底都解開晒喇！事關呢個細路嘅媽咪出現咗，仲解答晒大家嘅問題呀！

其實呢個小朋友一直都有同自己媽咪講開呢個鄰居隻狗，每次經過車房，佢都要望下隻狗先安落㗎！到底點解佢咁鍾意人哋隻狗呢？唔通隔離飯真係特別香？

原來唔係飯，係洋蔥！仲要係好大個洋蔥呀！呢個小朋友喺2歲嘅時候其實養咗一隻狗仔，但係最近過咗身，所以佢可能因為太掛住自己隻狗仔，就日日走去攬人哋隻狗喇！

個鄰居都冇介意呀，仲畀佢哋兩個嚟個真正嘅見面，唔使個小朋友再偷偷摸摸吖嘛！

呢份對動物純真嘅愛，而家真係好少有㗎喇。希望呢位小朋友可以一直keep住呢份童真啦，毛毛相信你隻狗仔喺天堂知道都會好開心嘅啫！

圖片來源、資料來源：Hollie Breaux Mallet