頭先毛毛叫外賣（係呀，哪有時間出去食，你老＿），話明個飯都多汁㗎嘛，點知都係乾爭爭，dry過毛毛條命。如果世界上嘅餐廳伙記都可以學下台灣呢個店員咁有求必應就好喇！

話說台灣有個肚仔餓嘅網民上網叫外賣嘅時候，一時頑童上身，手多多叫人哋搵個最叻玩玩嘅店員畫隻喵仔畀佢！呢個要求都真係夠晒過份，你話要多汁多飯都話畀你呀，反正係公司嘅，但要人哋私人醒隻喵畀你，畀著毛毛就唔睬你喇！

點知，善良又仁慈嘅店員真係喺餐紙上面即席揮毫，畫咗隻喵畀佢呀！有咩比收到咁無理嘅要求都照做更加菩薩心腸呢？就係畫足兩隻喇！

想收到幅畫就真係收到，梗係正啦，不過如果唔使落order 都有畫收就仲正呀！有個網民去買滷牛肉飯外賣嘅時候，老闆喺佢面前用咗唔夠一分鐘畫咗隻牛牛喺飯盒上面！高手果然在民間呀！呢兩位隱世高手雖然喺快餐店打緊工，但都從來冇放棄過成為一個小畫家嘅理想，好值得我哋欽敬呀！

封面圖片、資料來源： bl960150／twitter

順便睇埋：【霸氣意見書】出餐慢到我都畫好圖了