廢青想做老闆？其實唔難，就好似佢哋咁⋯⋯
喂！開Cafe喎！聽到都覺得浪漫啦！但點踏出呢一步先？「幾勤力都係幫人搵錢，既然有能力，點解唔幫自己搵？所以就決定做生意。」
首先你要有大隻老闆阿龍呢一個念頭。
然後，再加少少對老Seafood嘅不滿。
「老一輩覺得咁做唔得，你就做出嚟證明畀佢睇係掂，自己搞Cafe，係對前公司嘅制度不滿，我要做個樣版出嚟畀佢哋知，唔跟你個套我都可以搵到食。」
大家睇吓！佢似唔似啲哲學家，入咗個山窿沉思，一諗就幾十年，諗到頭髮都長埋？
Any肥，佢叫阿毒，係第二位老闆。
咁三家姐呢？
第三位老闆，有少少文青Feel，求9其叫佢「求其」得㗎喇！不過佢嘅花名同佢性格相反，認真工作之餘，對夢想嘅追求更加認真。
「我想喺度做嘅員工，可以揾到自己鍾意做嘅嘢，鍾意彈結他打機，冇客嗰陣咪彈結他打機囉，最緊要唔好打工打到得返個殼。」
【最緊要舒服】
話明係廢青，梗係要飲杯咖啡都慢慢嚟啦，唔係點叫浪費光陰呀？
「想有個舒服嘅環境畀人坐吓，就係咁簡單。」求其一邊食住蛋糕一邊解釋：「呢度，唔止係一間賣吓嘢食嘅Cafe咁簡單。每日都有唔同人上嚟，每日都有唔同嘅故事發生，我鍾意幫人解決問題。」
對香港人嚟講，舒舒服服過一日，其實好難，嘆咖啡食件Cake？腦細一個電話，on call 36小時嘅你即時苦過杯齋啡啦！
曾經去過澳洲兩年嘅阿龍，佢話：「澳洲生活嘅人壓力冇香港人咁大，起碼收入同付出成正比，而唔係啲錢去晒頂嗰層，香港人勤力又點，結果咪畀大財團壓榨⋯⋯」
「舒服」兩個字， 就係呢間Cafe嘅宗旨。「喺澳洲如果有人撞到對方，係會慢慢扶住佢，睇吓佢有冇事。喺香港？三秒內一係你Sorly，一係佢X你，香港人咁趕做乜？」
連鎖餐廳要賺到盡，呢度就寧願將啲位隔得外啲，坐得舒服啲，「喂，難得有得Relax吓，梗係要坐得好啲啦！賺少咗點算？是L但啦，希望啲客下次會再返嚟囉！」
廢青係有錢都唔賺㗎喇！吹咩？
【廢青係祝福】
如果要以學歷嚟區分一個人係咪廢青，呢三位老闆連大學學位都冇，夠晒資格做廢青啦。
「做廢青好好呀！」阿毒提出一個獨特嘅諗法：「做廢青係一種祝福。」
係囉，李白都話啦，「天生我材必有用」嘛！同樣道理，廢青都有生存價值。
「唔鍾意做嘅事咪唔做囉，唔做某啲事，可能為呢個社會帶嚟更少傷害，畀到家用，剩低有錢咪拎去玩，冇乜問題。」阿毒看破紅塵：「冇證書又點啫？人嘅成長，唔關學業事，係睇自己，有好多地方可以畀你去增長知識。」
同其他小店一樣，呢間Cafe一樣面對加租問題，阿龍表示：「業主加盡你可以點？冇㗎，唯有見步行步⋯就算終有一日做唔住，都要堅持自己做生意嘅理念。」
對小店嚟講，賺少一蚊，已經好大影響，但社會上仍然有好多「廢青」，寧願賺少啲，只希望香港人可以生活得舒服啲，喺圍城之中，壓力底下，可以稍稍喘息，坐低諗吓嘢，發吓吽哣，享受一杯咖啡嘅自由。
【順手睇埋】
------------------------------------------
毛記專題，不定期上市。
求9其做，純粹扮工蛇王，唔使期待。
【龍華軒咖啡室】
地址：旺角登打士街36號恆威商業中心17樓
電話：2651 8033 / 9227 7030 / 6131 0854
營業時間：
星期日至五: 14:00-02:00 星期六: 15:30-02:00
