由細到大，老師都教我哋做人唔可以自大，但一有時間就一定要自拍！唔自拍，班followers點知你今日去咗邊點知你今日開唔開心點知你今日有冇化住妝咁病呀，所以你話呀，自拍喺一個女仔心目中，係幾咁緊要！

美國就有個後生女Cassie因為沉迷自拍，搞到要老竇出手呀！個老竇出咩招咁巴閉？如果只係沒收手機或者封晒屋企啲鏡呢啲就低招啦，佢係身體力行出心出力咁對付佢呀，咪就係狂扮囡囡post嘅自拍相囉！

有冇人可以解釋到老竇肚腩上面隻三眼蜘蛛發生咩事……

要低胸有低胸，要紋身有紋身，又cos得幾似喎。至於頭上面嗰幾條草就……其實老竇唔係用噚晚食淨啲菜心已經好畀面㗎喇。

老竇就玩得咁過癮呀，但係聽講囡囡就因為咁而好唔高興喇！呀囡，打邊爐最緊要係個爐，一家人最緊要齊齊整整和和氣氣呀嘛！老竇為咗化你個超級眼線妝，啲墨水洗咗三日先洗得乾淨呀！下次不如唔好自私喇，同埋老竇一齊自拍啦，肯肯定仲多like呀！

封面圖片、資料來源：Daily Mail