由細到大，卡通片都話畀我哋知技安同大雄係對家，Tom同Jerry係世仇，貓貓同狗狗又一定係天敵。不過，希望在明天呀嘛！原來貓貓同狗狗唔止可以做FD子，仲可以係愛情故事嘅主腳！

喵星人同汪星人本來係兩個唔同世界嘅人，但今日佢哋能夠喺藍星呢間寵物店做同屋主，都算係一種緣份呀，仲擦出愛火花，上演一輯可歌可泣嘅現代羅密喵與汪麗葉?！

分隔開呢對苦命鴦鴛嘅，唔止係眼前嘅重重圍牆，更加係世俗嘅枷鎖！世人都覺得，汪星人咁熱情，喵星人又咁cool，點可以走埋一齊呢？但係羅密喵鼓起最大嘅勇氣，哪吒不怕海龍王，貓貓不畏翻城牆，佢出盡奶力咁向上爬呀爬，爬呀爬，只係為求見到darling一面！

呢個時候，汪麗葉都聞到羅密喵嘅氣味，準備好迎接愛人喇！佢仲企起身接住就嚟跌嘅羅密喵，係真愛呀，哈利！

大結局喇，雖然冇得一齊BBQ跳起yeah，不過都有情貓狗終成眷屬，你睇佢哋攬埋一嚿咁幾開心！狗狗仲問佢darling：你攰唔攰呀？我煮個麵你食呀汪！

羅密喵與汪麗葉嘅故事，真係睇到毛毛都滾動呀！但係唔知點解，笑下笑下，毛毛有啲眼濕濕嘅，唔通呢種就係人哋成日講嘅「長大後的笑，笑著笑著就有淚」？睇嚟咁浪漫嘅故仔，都係唔啱毛毛呢啲單身狗聽㗎喇……

封面圖片、資料來源：JoLinn Pet House 爵靈寵物

睇埋：【情何以堪】你哋啲情侶有冇諗過單身狗感受…