生日嚟講，毛毛不嬲都係返工當慶祝……乜感受公司嘅冷氣同腦細嘅黑面唔係就係最好嘅禮物喇咩？！不過對呢隻來自美國芝加哥動物園嘅鸚鵡Cookie嚟講，就梗係要大做啦，事關今年已經係佢83歲生日喇！咦，乜車輪冠鳳頭鸚鵡嘅平均壽命唔係大約得40至60歲㗎咩，唔通Cookie用咗賢者之石？

Cookie有冇用賢者之石毛毛就唔知，不過Cookie真係好叻叻，佢除咗係全球最老嘅鸚鵡之外，佢仲係僅存嘅開園元老嚟㗎！唔怪得動物園班員工咁齊人幫佢開party，又整個咁靚嘅蛋糕同佢慶祝啦～

見到佢仲眼仔碌碌咁食蛋糕，係精神嘅！

btw，如果大家想探Cookie嘅話，應該就難啲嘞，因為佢2009年嗰陣已經退咗休㗎喇。而家佢就喺保育員嘅鳥屋辦公室入面安享晚年，只係節慶或者生日嘅時候佢先會出現～毛毛希望佢可以繼續健健康康咁生活啦，係咪呀鸚鵡太郎？

圖片及資料來源：Brookfield Zoo