話說有對來自香港兼自稱從事旅遊業嘅王姓姊妹，六年前就喺台灣新北市租咗間屋。

最初呢對兩姊妹就同業主講話想養狗，ok fine，一隻狗就畀你養啦，不過唔可以再養其他寵物㗎喇。點知都住唔夠一個月，業主已經收到鄰居投訴，話佢間屋經常傳出惡臭！雖然業主已經話過呢對姊妹好多次，但情況都未有改善……直到今年5月終於租約期滿，業主諗住終於可以收返間屋啦，點知經過呢對姊妹求情後，業主又唔忍心趕佢哋走，所以就繼續租畀佢哋。

點知就喺早幾日，呢對姊妹突然連人帶租金人間蒸發！而就喺業主同警察一齊入返間屋度睇下咩環境嗰陣，就發現間屋變成咁樣樣喎……

到底點樣住先可以住到咁？搞到一屋係屎係垃圾，烏煙瘴氣，成個廢墟咁已經夠衰，仲要畀業主喺其中一間房入面發現一具腐爛咗嘅貓貓屍體？

所以咪搞到業主忍無可忍，要喺facebook出post將呢對姊妹嘅惡行公諸於世！佢話：「當初爸媽因為你們是出外人, 不忍心趕走你們~ 你看看你們拿什麼回報這樣的恩情!!!!! 以後絕對不租給外國人~ 尤其香港人~~!!! 把貓餓死在家裡我最不能原諒!!!!!!!」

雖然，唔係毛毛搞到間屋咁，但見到台灣人對香港人嘅印象愈嚟愈差，毛毛自己都覺得羞恥。老老77，面係人哋畀，架係自己丟，做返個正正常常負責任嘅租客可以嗎？

圖片及資料來源：Da-Dai Hsu