而家咁鬼熱，毛毛得幾條頭毛都覺得熱Q死呀，每次喺街見到啲長髮妹豬仲堅持到梳個偽ABC女神出街真係打從心底裡對佢欽敬欽敬！

行街就話要keep住個戰鬥格同其他妹豬fight過啫，同自己仔仔食烤肉就唔使喇啩，燒到㷫烚烚，唔係唔紮起把頭髮呀？不過呢個台灣妹豬就話自己嗰日咁啱唔記得帶埋佢條橡筋出街，所以好煩惱！

咦咪住先！唔好呃毛毛喎，呢條明明係電話線，點會係紮辮橡筋？聽女同事講，呢款係近幾年新出嘅橡筋圈，最特別係紮完放返頭髮都唔會有痕喎～就咁戴喺手度又可以當飾物，所以好受妹豬歡迎㗎～

好喇講返個冇帶橡筋嘅事主先～如果見到一個女仔食食下飯紮辮，你就知道佢有幾認真對待呢餐飯！好彩佢仔仔都一樣咁認真對待女友把頭髮，立馬伸出援手幫佢紮辮！不過一個正常男仔如果細心到隨身帶住紮辮橡筋你都驚啦，其實佢係用叉電線繞繞繞綁起啲頭髮呀！嘩，好有諗頭呀！個諗頭仲好大個?呀！毛毛都想識返個咁有諗頭嘅男友仔呀～hehe！

果然係生活智慧王呀下，好彩毛毛都唔弱，其實係生活智慧大王！毛毛都諗咗啲USB叉電線嘅用法呀：

1）玩二人三足

返office工一日坐足廿粒鐘，點可以唔得閒企起身郁動下！用叉電線綁住你同同事隻腳仔玩下二人三足，可以做運動之餘仲可以訓練合作精神呀！

（專業建議：如果同你至憎嘅屎忽同事玩，千祈千祈千祈唔好唔好唔好整跌佢呀）

2）唔怕走失

一放假行出街真係people mountain people sea，唔小心同fd子走失就煩喇！一人拎住一個叉頭，咁就算幾迫人都可以兩身牽啦，尤其是去大減價呀，一個迫埋貨架再一嘢大大力扯fd子埋去！唔係點同夠班大媽鬥呀！

3）當卡片派

好似即係暗示自己係職場usb……嗯，你懂的。

4）示愛

「我是風兒你是沙，我是叉頭你是手機，我真係好想進入你……內心，幫你叉足電，繼續上路。」

封面圖片、資料來源：dcard