仔仔就話最怕帶袋呀，但妹豬就唔帶袋唔得喇，喂你又諗咗去邊呀？毛毛講緊妹豬成日帶個大手袋出街，因為要袋住個個化妝袋呀嘛，帶化妝袋，係因為要帶一大堆化妝品出街補妝嘛。

怕甩妝啫下話，easy啦，一次過搽多幾層咪得囉！最近瑞典一個叫Jeely嘅Beauty Blogger就挑戰搽100層粉底上自己塊面度喇！呢個就係佢平時個靚樣，認住佢呀，一陣化完妝分分鐘唔認得㗎！

好喇事不宜遲，即刻開始上妝！搽完第一層，都仲正正常常呀，同平時見到嘅妹豬差唔多。

話咁快就搽咗廿層粉底喇，嘩，小姐邊位呀？毛毛已經開始有啲唔認得佢喇。

2個鐘頭之後，已經搽到第60層喇！Jeely仲要用呢個表面上係風筒實際上都係風筒嘅風筒吹乾塊面先可以繼續搽到落去呀。

呢個實驗進行咗3個鐘，終於搽晒100層粉底喇！真係變到一啲瑕疵都冇呀……真頭連佢個咀都睇唔到呀。唔係睇住佢由第一層開始搽，毛毛仲以為佢用錯咗花生醬嚟化妝呀。

畀100層粉底凌辱完，佢塊面仲過敏泛紅?，唉，拎自己塊面嚟鉸飛，何必呢。呢個實驗雖然講唔出咩大道理，不過就好有親切感，事關扮工室班同事雖然冇搽100層粉底咁多，但塊面皮都一樣有咁厚呀嘛。

封面圖片、資料來源：Jeely／YouTube、Daily Mail 

延伸閱讀：【做咩啫你】搽116層指甲油喺手係咩玩法？