林志穎，有錢兼靚仔，繼有咗Kimi呢粒寶貝仔之後，老婆又幫佢生咗對孖仔喎，簡直係人生終極大贏家呀！而最近，佢就上咗一個強國節目《熟悉的味道》度做嘉賓。

聽講個節目係講爸爸嘅。最初林志穎就講下自己同老竇之間嘅回憶呀、煮下老竇鍾意食嘅嘢呀、錄下老竇鍾意聽嘅歌呀咁，製作單位仲邀請咗林志穎嘅兄弟姊妹上嚟一齊傾下偈?～聽落都幾warm幾感人吖，係咪呀哈姆太郎？

可惜去到節目尾聲，製作單位竟然搵咗條老臨，仲用特技化妝幫佢化返林志穎已經過身嘅爸爸個樣出嚟，諗住畀個實派林志穎……嘩，今次真係唔方唔實派。

果然，林志穎一見到呢個硬膠版老竇，情緒即刻變得好激動。而喺呢個咁重要嘅毛文，cam man梗係唔輸蝕，嗱嗱聲close up佢個表情啦！

最後林志穎都係忍唔住，要離開拍攝現場冷靜一下……雖然好多網民都批評製作單位咁做好冇人性，好唔識尊重人，但節目效果嘅嘢你哋識條鐵咩？

圖片及資料來源：《熟悉的味道》