夜喇夜喇，夜就梗係食宵夜啦！毛毛唔知咩叫減肥，毛毛淨係知咩叫「食埋今餐先」……

話說早前毛毛就同大家介紹過良景宵夜有咩食，但良景嘅走鬼檔已經喺不知不覺間消失得毛影毛蹤，而家淨係得返由大財團經營嘅良景市集有宵夜食咋。不過唔緊要，同良景相隔幾個輕鐵站嘅龍門夜市一樣有好嘢食。

芝心雞排（1塊／$28）

大大塊嘅芝心雞排，一切開，啲芝士就流晒出嚟，真係諗起都覺得興奮！後記：本身毛毛諗住叫老闆切開塊雞排，等毛毛可以影張靚相畀大家睇，點知老闆就堅持話，切咗冇咁好食㗎！但為咗令毛毛可以完美放毒，毛毛都係決定搵把刀切開畀大家睇啦so9sad

手抓餅（餅底 $12，配料每款$4-9，最少揀一款配料）

老闆會畀張紙大家剔低要咩配料，配料有蛋、粟米、鹹牛肉、燒鵝肉、司華力腸等等，之後仲可以揀埋要沙律醬、咖喱醬定辣椒粉?～

芝心小丸子（7粒／$20）

呢度除咗平時食開嘅日式章魚燒之外，仲有芝心味同凍食嘅奶油芝士小丸子。老老77，聽到凍食嗰下真係幾心動，話晒大熱天時都想消下暑，點知老闆一句賣晒就收咗毛毛皮……最後，毛毛試咗芝心味小丸子，可能唔夠脆嘅關係，感覺有少少似食緊打邊爐嘅芝心丸。

狗仔粉（1碗／$19）

狗仔粉呢啲咁懷舊嘅香港街頭小食，毛毛見到當然要試試，有咬口嘅狗仔粉加上蔥花同菜脯，係唔錯嘅！

芝士醬配薯條（一份 $25，雙重芝士加 $8）

芝士醬配薯條，呢個配搭唔使講都知好食啦。貪心的毛毛表示：假如有埋肉醬就好喇……

Between，食咗咁多嘢就係口渴㗎啦，所以見到街尾有間賣特飲嘅舖頭，毛毛就狗衝了。所謂龍鳳檸樂，即係鹹柑桔加檸檬加可樂，鹹鹹地酸酸地，同洛神紅莓梳打一樣，飲完即刻會有開胃同冇咁滯嘅感覺。而菠蘿冰呢就……好有罐頭菠蘿嘅味道。

其實聽一眾屯門街坊話，龍門夜市不嬲都有，只係而家嘅小食款式比以前多好多啫～除咗毛毛介紹嘅呢啲小食之外，龍門夜市仲有串燒、蠔餅、酸辣粉、碗仔翅等等嘅小食！想睇下仲有咩食，咪嚟開屯門嘅時候順便試試囉，地址：龍門路43號龍門居地下（即係巴士總站隔籬呀）。

延伸閱讀：【毒L識食】其實良景宵夜有咩食㗎？