嗚呀！港版《Pokémon Go》今日解除封印喇，不過早幾日日本已經有得玩～啱啱過去嘅星期六晚，就有勁多小精靈訓練員去到名古屋鶴舞公園朝聖，野生捕捉小精靈喇！

嘩夜媽媽一個二個廢青拎住部手機照嚟照去，唔講仲以為佢哋撞咗邪呀！

喺咕咕map度睇，呢個鶴舞公園真係成個現實精靈球咁！唔怪得之《Pokémon Go》會揀呢度收埋咁多精靈球啦！

成日聽人講日本人好自律好乾淨，其實日本人都係人，都一樣會有一地垃圾嘅情況出現嘅，不過好彩嘅係，佢哋比較多會自發幫手清潔嘅好心人。吸引咗大批小精靈訓練員去收服小精靈嘅聖地鶴舞公園都唔例外，過咗一晚之後，堆積咗好多膠樽、煙頭之類嘅垃圾呀！

有後生仔就自發帶埋個大膠袋去執垃圾，清理好個公園，真係超抵讚呀！垃圾唔係好似小精靈咁一掉個精靈球就出嚟就收服到㗎，大家記得唔好亂拋垃圾呀，如果唔係，我哋嘅明日就會係垃圾滿盈嘅黑暗日子㗎喇！冇錯啦喵！

封面圖片、資料來源：Twitter