唔好以為喵星人汪星人除咗食同瞓就咩都唔識呀，其實佢哋都不知幾醒，知道晒人類做緊乜，仲好識畀反應，十足十成個小朋友咁㗎～如果毛毛有養小毛孩，一定會24小時同部機影實佢哋，因為佢哋每個表情都太搞笑太棧鬼喇，毛毛一秒都唔想miss咗呀！

話說台灣有個網民有日開開心心咁叫緊佢嘅喵主子同汪主子食mum mum，諗住可以享受下佢哋難得撒嬌嘅時間啦，點知一個唔小心，成兜糧就……跌到一地都係喇。

奴才！你仲唔嗱嗱聲掃返乾淨塊地？一陣兩位主子以為放題係咁狂食，食到肚仔痛就唯你是問呀！

但係冷靜嘅汪主子笨冇咁做，佢只係，瞪大對眼，唔出聲，繼續瞪大對眼，用眼神講：「我真係對你好失望呀汪。」

而出名cool嘅喵主子嘅眼神就更加…… 唉，佢嗰刻應該心諗：「我係咪收服錯咗個蠢人類？」見到聖上呢個樣，就知道個奴才今次死硬喇……

事後個論盡嘅鏟屎官就post返汪主子食飽飽嘅相，睇嚟佢心情好返好多，有嘢食就將奴才倒瀉糧嘅事唔記得晒喇啵～不過毛毛相信，喵主子就唔係咁易氹得掂喇，奴才，R.I.P.啦……

封面圖片、資料來源：dcard