老老竇竇，對一眾貓奴狗奴動物奴嚟講，有咩開心得過見到流浪毛孩有家可歸啫？

而最近，一間位於德州嘅流浪毛孩收容所Fort Worth Animal Shelter就喺Facebook上宣佈，佢哋所內嘅310隻流浪毛孩全部成功被領養呀！而且仲要係一日之內就畀人領養晒?～真係多謝晒一班有心人令流浪毛孩再次成為主子！

不過話時話，又會突然之間咁多人領養毛孩嘅？是咁的，其實呢間流浪毛孩收容所之所以能夠一日清籠，都係因為佢哋參加咗由NBC同Telemundo電視台發起嘅 「Clear The Shelters」活動，等大家有多啲機會認識一眾流浪毛孩咋～

而收容所嘅職員就表示，雖然見到啲籠空晒真係有少少空虛，不過見到佢哋搵到新屋企新主人……都係開心仔嘅！

（感性mode）成日睇新聞，啲新聞唔係話邊隻貓狗畀人虐待，就係話唔知邊個動物園對啲動物有幾差，好似呢單310隻流浪毛孩全部被領養嘅新聞真係比較少見。如果，毛毛話如果呀下，如果以後可以淨係見到呢啲咁正面嘅新聞，你哋話幾好呢。

圖片及資料來源：Fort Worth Animal Shelter