作為一個食家，梗係齋食唔洗㗎啦，你估洗碗就真係淨洗碗咁簡單呀？又要抹爐頭又要清埋鋅盆個去水位啲渣，不知幾麻煩呀。偷偷地話你知呀，有時毛毛趁毛母睇唔到，都會唔清鋅盆就走咗去㗎……

毛毛終於搵到知音人喇！日本呢個網民都一樣揸流灘，食完蜜瓜冇執返乾淨個鋅盆去水位，留返晒啲核喺個筲箕度。有一日，竟然就見到個去水位有幾條芽菜喺個邊度生出嚟……

一打開個蓋，嘩！好茂盛呀！直頭好似睇緊變變變生命力咁呀！大佬你到底有幾耐冇清過個去水位呀？好彩毛毛冇試過吞埋蜜瓜核落肚啫，唔係實喺頭頂生芽菜！

原來之前都有唔少大頭蝦因為唔記得清乾淨個鋅盆，搞到個去水位變咗個小花園，湧咗一堆芽菜出嚟㗎。而家買條菜都十幾蚊斤呀，毛毛決定以後食完咩都擺喺鋅盆，睇下可以種到啲咩出嚟！唔知擺幾粒豬骨可唔可以種到隻豬仔呢？

封面圖片、資料來源：twitter

＜變變變生命力系列＞

【到底要濕到幾時】連電車都生埋菇喇！

【點做到㗎】電腦壞機原來係因為粒菇

【生氣勃勃】都叫你打完丁要掉紙巾啦　而家生菇喇！