毛毛身邊好多女同事都日日好努力咁又搽防曬又擔遮，有時仲話要去做激光，就係為咗要塊面一粒雀斑仔都冇。但係台灣呢個老竇竟然主動去紋身，紋到成隻手臂都係斑點？！有頭髮邊個想食咖喱呀，原來佢咁做，背後係有好大個洋蔥㗎。

台中呢個39歲嘅爸爸將成隻手臂紋滿一粒粒斑點，其實係為咗佢個3歲嘅寶貝女。阿女不幸罹患「色素性蕁麻疹」，全身都生滿好似老人斑咁嘅色塊，爸爸驚佢開始返幼稚園之後會畀其他小朋友笑，所以就決定去紋身，變到同囡囡一樣，鼓勵佢唔好自卑。

爸爸仲同囡囡講呢啲斑點係「小星星」嚟，佢有嘅特徵，爸爸都一樣有。但係天真嘅囡囡就話「爸爸，我嘅小星星比你多好多」，雖然可能只係小朋友一句無心嘅說話，但爸爸就一直記喺個心度。

於是，爸爸又再去搵紋身師傅搵佢再紋多啲斑點喺手臂上面，希望等寶貝女唔好覺得自己係異族！

細個阿媽成日話公仔佬冇個好，但呢個爸爸就唔理其他人點睇，為咗乖女而忍受紋身嘅痛楚同其他人嘅奇異目光，真係好偉大！歌仔就唱「世上只有媽媽好」，但其實爸爸都一樣默默為囝囡付出，一樣咁好。

封面圖片、資料來源：東森新聞、laba0602／instagram