一向都致力為打工仔爭取「地鐵塞車都可以成為遲到原因」嘅港鐵加咗咁多次價之後，終於做返啲嘢畀大家睇喇。噚日港鐵喺facebook 貼咗幾張相，同大家介紹新一代列車採用嘅新款懸掛式扶手吊環呀。

呢款扶手吊環係一個藍色圈圈咁，同用開嘅紅色三角款好唔同。聽講仲係用軟膠做物料，應該就冇咁硬膠膠嘅。

係就係冇咁硬膠膠，不過都有唔少網民留comment插爆，話港鐵多嚿魚呀！好多人都覺得外觀唔靚、隻色唔夾之餘，由於條吊環個邊邊位唔係圓嘅，所以揸幾個站就已經手都痛，條吊環仲會揈嚟揈去，根本企都企唔穩咁話。

Between，可能毛毛淆底仔性格啦，啱啱到咗農曆七月，又見班網民話似吊頸圈，真係有啲寒已心。

唔知有冇人記得《富貴再逼人》入面呢一幕呢？唔知有冇人都一樣，唔係話鍾意以前呢款波波扶手，但就好掛住以前搭地鐵就會想哼「地下鐵碰著他～」嗰個帶點浪漫嘅香港呢？

封面圖片、資料來源：MTR