唔知有冇人同毛毛一樣，行過超市貨架，自自然然會售貨員上身咁，伸隻手出嚟將啲貨品排返整齊嘅呢？嗰種感覺簡直好似有種魔力引你執貨咁，想忍都忍唔住！（如果份工真係要執貨又另一種講法啦下）

台灣有個做7仔店員嘅整齊小寶寶，話佢有一日太得閒，所以就扚起心肝將舖頭入面全部貨品都擰返晒個正面出嚟呀！見到咁整齊嘅畫面，真係成個心都莫名奇妙地覺得好治癒好爽！

唔止飲品呀，連杯麵、糖同薯片都一樣擺得整整齊齊！呢個7仔店員幼稚園嘅時候肯肯定成日拎到老師畀嘅兔仔印仔！

唉，拎開污糟豬印仔嘅毛毛表示：平時老母叫我執房，就係咁執㗎咋。將堆衫左搬右右搬左咪算囉，眼不見為淨呀。

封面圖片、資料來源： dcard