嘩！乜一地都係發泡膠箱嘅？係咪早幾日八號風球吹到周街都係呀？我哋班廢青就話好恨打風打破個李氏力牆，可以放返日假抖下呀，辛勤勞苦嘅水貨客就唔同喇，2號打完風，3號已經即刻出動分龍蝦！

北區水貨客關注組就影到，水貨客喺上水寶運路分完689夫人之後，拍下蘿柚就走人，留低大堆發泡膠箱左一個右一個，霸晒成條行人路呀！

其實又點止分完龍蝦會一地發泡膠箱呀，隧道、路邊都一樣唔係紙皮就膠袋，唔講仲以為自己行咗入流局長個肚入面。

受到一眾水貨客寵幸嘅水貨之城，又點止上水呀，原來大埔都一樣GG鳥。不過咁，唔好再成日叫人「水貨賊」咁冇禮貌喇，你幾時有見過有賊人係會留低禮物畀你㗎？咩呀，發泡膠箱同紙皮當禮物唔得㗎？

封面圖片、資料來源：北區水貨客關注組

延伸閱讀：【大埔淪陷】水貨客就係可以光明正大咁拆貨呀吹咩？