作為一個日夜鍛練去取勝嘅小精靈訓練員，掟精靈球嘅技巧，毛毛都掌握得七七八八喇，就係成日都唔得閒孵蛋囉。鬼咩，成日都坐喺扮工室，邊度孵到蛋啫。雖然Pokemon Go呢隻game原意係想人就算做低頭族，都做個多啲郁動嘅低頭族，不過小智高一尺，火箭兵團高一丈，有唔少小精靈訓練員都諗到點樣坐定定出貓！

唔好以為得後生仔先會做小精靈訓練員呀，其實阿媽一樣冇放棄過成為一個出色中年廢青呢個偉大理想。台灣有個網民就表示佢阿媽又想孵蛋但又驚出去會曬黑，竟然諗到用風扇嚟孵蛋……

佢一開頭係用膠袋包實部機先嘅，孵咗半個鐘又驚部機會過熱，所以又轉咗用裝水果嘅網嚟放部機，55，都幾有智慧呀。估唔到阿媽原來唔係淨係識玩candy crush呀下。

For all you trying to hatch an egg in Pokemon go here's a tip from my brother pic.twitter.com/XiKNPPlYze

— Mitch (@mitchhughes18) July 10, 2016

想刺激啲，用吊扇都一樣得㗎！咁樣樣應該會快好多！I mean快好多跌爆部機呀。

孵蛋呢家嘢，點都係母雞先夠pro嘅，不如都係將孵蛋呢個重任交返畀佢啦。

香港冇得養母雞唔緊要！畀哥雞孵都一樣得啫！

聽講用按摩器震震震都可以成功孵蛋㗎，不過唔知點解個個一聽到就陰陰咀笑……毛毛都唔明佢哋笑咩，等我翻睇寵物小精靈，睇下係咪小智喺邊集用過先。

封面圖片、資料來源：PTT、mitchhughes18／twitter、youtube