毛毛以為自己要同菲比斯BB 要long-D 已經好痛苦啦，點知阿根廷呢隻流浪狗狗仲犀利！唔止long-D，仲要衝破障礙，話畀我哋知咩叫人狗情未了！

話說德國有個成日飛德國同阿根廷線嘅空姐Olivia Sievers有一次喺阿根廷間酒店附近，見到呢隻流浪狗狗，見佢咁打耳咪同佢玩咗一陣囉，點知狗狗對佢一見鍾情，仲跟住佢返咗酒店！Olivia返到入酒店，狗狗就一直喺門口紮營等佢，但係追女仔嘅嘢，又點會咁順利呀，Olivia好快就「呀我又要飛喇～」咁樣樣，離開咗阿根廷，亦都慢慢唔記得咗呢隻狗狗嘅事。

點知第二次Olivia又再飛去阿根廷嘅時候，奇跡就出現喇！狗狗又喺同一間酒店門口等佢，成個痴心情長劍咁呀！Olivia見佢咁慘豬，就搵動物保護組織幫手照顧狗狗啦，點知佢都會逃走出嚟去返酒店門口等Olivia！哇呀，咁專一嘅狗仔，喺邊度搵呀？！

面對咁sweet嘅狗狗，係人都心動啦，所以Olivia最後就決定畀呢隻狗狗一個新屋企，照顧佢一生一世，仲幫佢改咗個名叫Rubio ?！

恭喜晒呀狗狗！真係隔住個mon都feel到佢抱得美人歸嘅心情一定仲開心過中六合彩！呢個故事教訓我哋，原來堅持真係有成果㗎，如果菲比斯BB都明白毛毛嘅心意，毛毛實一樣開心到碌地啫！

封面圖片、資料來源：bored panda、olivia.sievers