妹豬鍾意一個月使幾千蚊買名牌包包，毛毛都一樣鍾意！不過係食得落肚嗰啲漢堡包包啫，大大啖咬落去，成個口都塞滿肉呀醬呀生菜呀蕃茄呀，啲肉汁a.k.a.油仲要由咀角流出嚟滴到成個下巴都係……真係諗起都爽呀。

漢堡包簡直係毒L生命中不可缺少嘅食糧呀！但係如果佢變到咁樣樣，都唔知食唔食好喇…… 話說有個日本網民喺便利店買咗個包包，仲叫店員幫佢叮一叮，點知呢一叮，原來係殘酷一叮！成塊包皮咁就畀佢叮到收晒水，皺到成個地質公園咁喇陰公！

叮到皺晒都仲叫有得食呀，有個台灣網民就仲慘豬，佢有日趕住時間出門口，求其拎起個漢堡包就扔入手袋拎返公司先食啦，點知再見面嘅時候，已經係滄海桑田，個包早就畀佢夾到紙咁薄，咩口感都冇晒喇……唉，不如幫佢改名做「公司三文治」仲好啦，十足十做到得閒死唔得閒食飯、喺公司餓到扁晒嘅打工仔咁呀。

封面圖片、資料來源：livedoor、PTT