唔怕話你知，其實毛毛好鍾意喺公司開大嘅，嗰種又舒適又自由嘅感覺真係世界級！但係點解，點解上天咁鍾意喺人類去廁所嘅時候嚟考驗我哋㗎！

之前唔知邊個放個老麥叔叔公仔喺廁所出面已經嚇到毛毛標sss㗎啦，估唔到呢個香港網民遇到嘅呢個廁所更加得人驚，唔講仲以為係鬼屋佈景嚟?呀！

話說呢個網民送完貨，諗住借個廁所嚟用下啦，點知一打開門就見到咁樣樣……個廁所又窄又污糟都唔緊要喇，放把紅遮喺度係咩玩法？係咪最新藝術裝飾嚟㗎？咁啱呢排又係鬼節，一班網民都好關心樓主，毛毛完全感受到咩叫人間有愛呀。

樂觀啲諗，影到把遮啫，又唔係影到汪阿姐喺入面，唔使嚇到個心離一離嘅。而且咁有節日氣氛，咪當應下節囉！老老竇竇，毛毛就覺得牆上面啲sss漬得人驚啲喇，X你唔好掂到我呀喂……！

圖片來源、資料來源：Ka Wai Wong／小心駕駛(討論別人駕駛態度)