BB，記唔記得今日係咩日子呀？根據毛記民調結果顯示，10個男人有9個都畀呢條世紀難題考起過，老實講，唔識答呢條問題嘅下場都真係幾慘㗎！不過呢位來自英國嘅阿Mark就唔使驚呢～事關佢哋一家三口嘅生日都一樣係8月1日呀！

下，唔L係呀？要有女已經難㗎啦，但呢位阿Mark竟然搵到個同自己同一日生日嘅老婆，仲要生埋一個同自己同一日生日嘅囡囡?？有緣到咁，到底呢個係咩玩法？真係仲難過中六合彩喎喂！

有博彩公司都話，其實一家三口要同月同日生嘅機率只有4800萬分之一㗎咋～

話時話，一個生日蛋糕三份食，即係每年慳返兩個蛋糕，咁十年咪慳返廿個蛋糕？計落真係慳返唔少喎……如果毛毛都好似佢咁，搵個同自己同月同日生嘅老婆、生埋個同月同日生嘅BB，再加埋腦細加嘅100蚊人工嘅話，咁咪上樓不是夢囉？！55。

圖片及資料來源：Evesham Journal