唔知有冇百厭星細個試過打電話落茶記幫隔籬屋叫外賣咁曳曳呢？一時代有一時代嘅百厭星，而家興上網叫外賣㗎喇，啲百厭星仲要唔係整蠱隔籬屋，而係店員呀！

有台灣網民話佢落order嘅時候特登要求咗項特別服務…喂唔好諗歪嘢喎，佢係話想請個最叻畫畫嘅店員畫隻狗仔畀佢呀！

點知個店員又真係有求必應，喺張單上面即席揮毫，畫咗隻傻狗狗喎。店員心地咁好，其實係咪聖誕老人秘撈呀？爬煙囪送外賣嗰陣小心唔好倒瀉汽水喎……

做打工仔嚟講，你以為有求必應係咁say yes就可以做到好好先生咩？少年，你太年輕喇，喺其他同事眼中，呢啲叫做「做壞規矩」咋……可能啲百厭星見叫狗有狗咁過癮，所以又試下叫雞有冇雞啦，仲要又打蝴蝶結又打呔，好好玩咩？你唔好要人哋送貨嗰陣唱洗腦神曲《雞全部都係雞》畀你聽？

封面圖片、資料來源：靠北麥當勞