繼早前有老母拎咗阿囡對扎染襪去漂白後，呢幾日又有另一位老母做咗啲窩心得嚟又帶點幽默嘅舉動喎！而家就等毛毛同大家一齊睇下～

是咁的，話說有日本網民喺夾公仔機夾咗《星之卡比》入面隻盔甲武士返屋企。大家睇隻盔甲武士幾大隻～以毛毛9估，應該都花咗唔少心機先夾到喎！

嗱，有睇開／玩開《星之卡比》嘅朋友仔都知，其實黃色嗰兩點係盔甲武士對眼嚟嘅，不過呢位日本網民嘅阿媽就以為黃色呢兩點係牙嚟，仲以為隻公仔少咗對眼，所以佢咪諗住做下好心幫隻公仔加返對眼囉……

剪呀剪，縫呀縫……登登登櫈！

唔止咁，佢仲即時將呢隻咁有特色嘅盔甲武士send返畀呢位網民睇?～

呢位網民心諗，今次真係多得你唔少……btw，計毛毛話，盔甲武士加多對眼又點喎？你以為阿媽真係唔知黃色嗰兩點係盔甲武士對眼咩？其實阿媽係想你學識「帶眼識人」呢個道理先幫你改裝隻公仔咋傻仔！仲唔快啲謝主隆恩？

圖片及資料來源：koukakuruida／twitter、kirby wiki