唔少Beauty Blogger或者IG紅人都鍾意上網分享扮靚心得，呢頭又喺鏡頭前面show下件化妝品，嗰頭又搽幾廿層嘢上塊面度仲要話係自然素顏妝……算啦，化妝嘅嘢，男人識條鐵咩，如果有Beauty Blogger想進軍男性市場，就一定要學下呢個妹豬喇！

個嘴仔紅卜卜又水嫩嫩咁，真係睇見都想錫佢一啖呀嘻嘻～睇真啲，原來佢搽嘅唔係普通唇膏，而係茄汁嚟呀！有個妹豬用咗唔同快餐店嘅茄汁搽上個嘴仔度，試下邊間嘅茄汁效果最好。佢畀麥記茄汁嘅評語就係「滋潤，持久性差，上嘴磚紅色」喇～

跟住唔使講都知，梗係試埋218 5個刑間雞記啦。佢話雞記茄汁就「易塗勻，可薄塗​​，上嘴亮橘紅」。毛毛都加把嘴先，似乎想扮後生女就揀麥記好啲，想有女人味啲就可以用雞記啵～

呢個茄汁試色post，一日已經幫佢呃到萬幾個like喇！今日佢仲挑戰埋用唔同醬搽上嘴睇下有咩效果！首先係士多咩梨果jam，佢就話「光澤感強，上嘴嫩粉」啵～

跟住再試埋藍莓果jam，評語係「易塗勻，上嘴玫紫色」，呢隻色深深地，睇嚟唔係咁易carry，原宿系少女或者會啱用啩？

下唔係啩！連老乾媽辣醬都試埋？！評語係「上嘴亮橘色，有些發黃」，雖然係幾好睇，不過毛毛搽完實淨係講到「媽！好辣呀」！

嘩呢個又係咩妝呀？毛毛接受咗咬唇妝、黑色嘴呢啲潮妝冇耐咋，咁快又彈個嘔泡妝出嚟？fashion嘅嘢，真係好難明呀下……哦，原來個妹豬本住冒險精神，試埋用薯蓉搽嘴呀。嗯，識欣賞就會識欣賞囉，不過肯肯定最大缺點係唔持久！擺到埋嘴邊唔通唔食咩，罪大惡極呀！

封面圖片、資料來源連結： 涉黃欲夢／微博