唔講唔知，原來已經到咗「處暑」！而「處暑」嚟講呢，即係表示夏天即將完結，好快就到秋天，又即係表示女士們終於可以買衫換季囉……為咗祝賀一眾唔買唔舒服嘅ladies and gentlemen終於可以換季，毛毛特登做咗少少資料搜集，同大家介紹以下呢個來自日本牌子CUNE嘅2016秋冬時裝～

1）混凝土系爛牛套裝

以爛牛嚟講，呢件都算係爛牛究極體！嗱，大家唔好以為整爛件牛仔套裝好簡單，其實點樣爛法都係經過精心設計嘅，不規則嘅爛法令model著上身後增添幾分身經百戰、歷盡滄桑嘅感覺，係成熟男士必買item之一！

2）沼澤系公主袖長裙

眾所9知，公主一向畀人高高在上嘅感覺，但經過設計師專程將條裙整到好似畀火燒過一樣之後，個feel即刻唔同晒，著咗上身仲好似有種浴火重生嘅感覺?！

3）瀝青系黑色老西

唔少打工仔返工都係要著老西（雖然毛毛唔係），雖然大家表面好似好光鮮咁，但其實內裏真係有苦自己知。而呢套西裝就充分展現咗打工仔畀腦細玩殘之後嘅狀態嘞，相信一眾打工仔著咗呢套西裝之後一定會更加自在㗎啫！

4）草原系露背外套＋兔仔圖案長褲

本身呢件外套嘅設計係偏向中性嘅，但襯咗呢條兔仔長褲之後，可愛嘅感覺就即刻出晒嚟～加上呢件外套嘅背面有露背設計，性感得嚟又唔會太暴露，真係非常適合各位貪靚嘅妹豬。

老老77，大家唔好睇呢幾件衫嘅設計好似溶溶爛爛咁，其實只要大家用心感受一下，就自然明白設計師喺背後係花咗幾多心思。唔係講笑，如果唔係毛毛那有錢嘅話，毛毛都想買返幾件嚟傍身呀！55！

圖片及資料來源：Fashion Press