後生嗰時毛毛一啲都唔錫身，落親埸打波都博晒老命，所以咪成日要打石膏囉……不過成班損友都會喺嚿石膏撩返隻龜，又係幾有愛嘅。唔知哈姆太郎打石膏，佢班朋友仔又有冇同佢轉圈轉圈簽返個名呢？

唔係喎，倉鼠隻腳仔咁細，打石膏都迷你過人啦，仲邊有位簽名……笑咩呀？好出奇咩？倉鼠都有靈魂，倉鼠都需要愛，倉鼠都可以打石膏㗎！呢隻倉鼠仔咪就係因為骨折要送入醫院囉。點解毛毛話唔准笑？因為呢隻倉鼠仔背後，其實有好大個洋蔥㗎……話說post呢張相嘅網民係個獸醫，當時有個老太太帶呢隻倉鼠仔去求醫，話係佢過咗身嘅老公送畀佢嘅，所以好緊張，無論要使幾多錢都想救返佢。一年後網民收到老太太嘅感謝卡，話倉鼠仔已經走咗，不過都好多謝獸醫幫助，等佢哋可以有多啲時間相處。

唔止打迷你石膏呀，有網民話佢都試過用廚房紙摺條超迷你尿片畀佢隻天生後腳不良於行嘅倉鼠仔～倉鼠仔安心覺覺豬個樣真係巧打耳呀～

老老竇竇，倉鼠仔個醫生都幾好手勢咁喎，咁細隻腳仔都包紮到，下次毛毛第五肢整親都可以幫襯佢喎。

封面圖片、資料來源連結：GeorgeOnee／reddit