相信唔少人都試過一個慘痛經歷，就係去完幾日camp或者旅行返嚟，阿媽好有成功感咁望住你話：「我幫你執好個狗竇喇……」佢都未講完，你一狗衝入房，就發現阿媽果然幫你扔晒啲「垃圾」。

咩垃圾呀！明明係我辛辛苦苦儲咗好多年嘅寶貝嚟！台灣有個網民開post同大家些牙佢儲落嘅寶貝，真係令毛毛大開眼界呀。唔知有冇人見到一系列彩虹色嘅嘢，一定會好似撳咗掣咁要儲晒一套㗎呢？

好多人哋眼中嘅垃圾，收集控都當係寶㗎，就好似新衫吊排呀、即沖咖啡個膠杯蓋呀、塞喺新鞋時入面張紙呀、攝喺新衫入面張紙呀、甚至用完嘅顏料包裝都有！

唔止呀，佢連開咗嘅面膜包裝都會畀心機洗乾淨再晾乾儲起佢呀！咁又係嘅，個包裝又碎花又粉色系咁，啱晒妹豬心意啦。

有人就鐘意乜都儲一餐，咩都唔捨得扔呀，但都有人祟尚極簡主義，相信「less is more」哲學㗎。日本極簡主義達人佐佐木典士屋企就只有150件雜物，衣櫃入面都係得 3 件上衣、4 條長褲同4 對襪咋。

佢話生活入面只需要擁有必需品就已經好足夠，人如果有太多物件，呢啲物件反而會成為壓力來源，令人冇時間處理身邊更重要嘅事。

有人相信我哋唔應該以物件數量去展現自我價值，但都有人鐘意透過收藏，保存過去嘅回憶，你又係邊類人呀？

封面圖片、資料來源連結： dcard、佐佐木典士／twitter