毛毛歷盡千辛萬苦，坐咗幾個鐘頭車，冒住成為白紋伊蚊放題嘅風險，潛入大埔林村，唔係為咗許願，而係為咗搵到呢位隱世奇人Chris同佢埋喺土裡面嘅寶物。

你唔好問毛毛長途拔涉、千里迢迢嚟到值唔值得，因為Chris由開呢個農場到而家，從來都無質疑過自己所付出嘅汗水值唔值得。

古怪農夫 擇善固執

Chris係一位好傻嘅農夫，喺大埔林村從事有機耕作。點解毛毛話佢傻？咪就係因為佢有錢唔賺囉。賺錢喎，香港核心價值嚟㗎喎。

「啲人呢排興乜就種乜，真係追極都追唔掂㗎喎！反正自己塊地上面都有咁多老嘢（啲數以十年計嘅植物），成咋金喺到！」Chris霸氣咁講。

雖然佢嘅農場有成四萬呎，但你唔會喺入面搵到好流行嘅有機菜，你只會搵到好多好多有機嘅保健植物──川七、南非葉。

問到佢點解唔種啲比較賺到錢嘅有機菜，佢反問毛毛：「點解自己農田有好嘅、有益嘅植物唔去種，反而要跟潮流呢？」

做人，何嘗唔係好似佢講咁吖～唉～

棄商從農 田中尋寶

2014年之前，Chris係一間紡織公司嘅老闆，每年嘅訂單總額超過三千萬。

一場歐洲嘅金融危機殺到，令一個從事紡織成衣三十幾年嘅人飽經人情冷暖，合作多年嘅歐洲時裝公司話Cut單就Cut單，Chris心灰意冷萌生去意。機緣巧合之下，佢由租戶手中收返家族喺大埔嘅農地。佢諗都無諗過，原來一直無留意嘅呢片土地，埋藏住數之不盡嘅寶物。

「落嚟收地嗰下發現，嘩，咁多嘢喺到嘅！」複述返當日情境，毛毛都仲可以感受到佢嘅驚訝。除咗一啲屋企長輩種落嘅果樹，Chris仲喺農地裡面發現川七籽同南非葉。

其中一棵南非葉大有來頭，話說佢已經喺到十幾年㗎喇。最初，係由林村裡面一位村民喺汶萊帶返嚟，原本就係想種畀嗰位村民患乳癌嘅老婆食，幫助佢康復。

務農的啟示

你有無見過白雪雪嘅農夫？毛毛有，毛毛真係有。嗱！雖然Chris白雪雪，但佢真係腳踏實地、親力親為、落手落腳咁自己種田㗎！

見到Chris咁辛苦，毛毛就忍唔住問佢有無後悔，佢反而講咗一段令毛毛印象深刻嘅說話。

「（以前）對住設計師、廠商、買手，同佢哋不斷周旋，我而家情願對住啲植物⋯⋯」

「植物又唔會同你講大話，但係人對人就唔係啦嘛，勾心鬥角㗎嘛！」

 （毛毛一路聽一路不斷點頭）

之前，因為一件醫療事故，令到Chris嘅右腳靜脈積聚血塊，導致右腳行動不便。佢好自豪咁講：「我食川七籽先通到啲瘀血消腫！」一講到呢啲保健植物嘅親身試食經歷，Chris簡直無停過，滔滔不絕咁話比毛毛知：「川七可以降三高，又可以行氣活血，我之前落田無力，食咗一排覺得好氣咗／熱氣飲南非葉茶啦，你哋成日捱夜就啱晒喇，醫生都睇少啲！」聽完毛毛直頭覺得自己係一條孱毛⋯⋯

Chris視植物為寶貝、為朋友。

佢喺植物身上得到營養，佢都希望可以好好照顧佢班「小朋友」。植物就最怕壞天氣，風吹雨打好易吹冧啲樹、浸壞啲根。Chris憶述有次颱風之後佢救木瓜樹，「你睇住佢冧喎，你始終想救返佢㗎！」雖然只係一句，但係毛毛想講：係愛呀！

就係因為Chris啲寶貝咁幫到佢，佢又咁愛啲寶貝，佢更加唔想埋沒咗佢地。所以Chris一直都好希望多啲人知道有機保健植物嘅好處，尤其喺香港呢個人人生理、心理都唔健康嘅城市裡面。

生於斯取於斯　回饋於斯

如果你問Chris喺香港做有機耕作難唔難，毛毛可以好肯定佢會答你，「難，好很難」，尤其係種呢啲香港只得佢一個人種嘅保健食材。

先唔講正苦嘅資助補貼係幾咁微不足道，就算靠自己努力去種，種完出嚟都唔擔保你賣得出。

Chris向毛毛透露，其實香港嘅有機食品店都有「領式霸權」，呢種連鎖店通常都只會賣進口貨，「但係你喺入面，唔會搵到有一樣香港嘢賣，亦都唔會有有機菜」，佢唔會畀你放你啲貨去賣。

佢跑過港九新界嘅有機食品店，肯借個貨架畀佢賣嘅只係得一啲小店。

呢個情況令Chris反思，到底呢一種營運模式同有機耕作理念係唔係相違背呢？地球污染問題愈嚟愈嚴重，既然有機耕種係為咗環保，點解仲要咁遠水路由外國進口呢？

可能愈親近土地，愈會愛惜土地，Chris語重心長咁話「而家香港地一年比一年熱，就係話比你聽個地球病緊呀嘛。」This World Is Dying ！唔到你唔信。

訪問尾聲Chris提醒毛毛，唔可以做一個自私嘅人，唔可以忘記將來既人類同你一樣都擁有享用地球資源嘅權利，「如果你唔保育泥土，保育水源，人類點樣永續呢？」

如果大家諗一諗，我哋背後有一個人默默咁為大家付出、堅持，大家又會唔會自私得落呢？

（多謝 食療農社 畀毛毛嚟蛇下王～）

===============================

毛記專題，不定期上市。

求其交貨，純粹扮工蛇王，唔使期待。