上一次就同大家介紹過5個沙田影相靚位，話明10個，毛毛唔會走大家數嘅，今日就講埋另外幾個好推介啦！大家要做好心理準備呀，因為5個有3個都要登高㗎！

（6）道風山

唔少區外人都話試過夜晚搭車經過沙田見到凌空有個發光嘅十字架覺得好不安，但相信沙田友就見慣不怪喇。個大十字架位置係道風山基督教叢林，無論你係唔係教友，上去散下步，影下相都好舒服㗎。

道風山上面除咗最著名嘅十字架，仲有古色古香嘅中式建築群。星爺套《鹿鼎記 》鰲拜抄家一幕，咪就係喺呢度拍㗎囉。不過要留意，道風山始終係靜修地方，大家記得要保持安靜同尊重呀。

點去：沙田火車站沿沙田鄉事委員會後面之小路步行上山 ( 路程約30分鐘）或大圍站轉乘的士

（7）望夫石

望夫石嘅故仔，相信大家都聽過喇，就係從前有個漁夫出咗海打魚，佢老婆就日日孭住阿B上山睇下老公幾時返嚟，等下又一日，等下又一年，最後就變咗嚿大石喇……望夫石座山唔難行，最啱忽然想做運動但又唔想太攰嘅朋友仔，由紅梅谷燒烤場開始行，大約40分鐘就上到去㗎喇。

點去：由紅梅谷燒烤場上山

（8）獅子亭

港島區有個老襯亭就係人都知呀，沙田獅子亭你又上過去未呢？由獅子亭望出去，差唔多可以望晒成個沙田。如果你咁啱係沙田人，上到嚟望住變到Lego咁細嘅樓，慢慢搵返自己屋企、小學、中學，同朋友傾下自己喺城門河兩旁發生過嘅故仔，都幾浪漫㗎。

點去：（留意返，講緊沙田獅子亭，同沙田坳獅子亭兩個地方嚟）沙田火車站坐69K小巴到總站

（9）渭濱城

係咪唔講以為自己去咗古裝片廠景呢！大圍有個隱蔽嘅影相位，就係渭濱城（又叫博雅山莊）。

70年代嘅時候，呢度係呂樂總探長嘅渡假別墅，除咗主樓之外，仲有池塘、巨型假山、中式樓閣同涼亭。後來賣咗畀人開中國餐館「國際城」，不過喺87年起城門隧道公路嗰時拆咗大部份建築物，所以而家就得返個城樓喇。

點去：大圍火車站A出口沿大圍道直行至美林邨，渭濱城位於黃允畋中學對岸

（10）美林公園仔

想尋找失落喺公園仔嘅童年回憶，除咗去瀝源，仲可以去大圍美林邨。呢度唔止有鐵製搖搖凳，仲有孤伶伶嘅金屬滑梯。以前放暑假，就算條滑梯畀太陽曬到幾熱都好，都一於好少理，瀡落嚟玩咗先算。不過呢條滑梯已經封住咗，只能夠影相唔可以玩喇sorry……想影都要快手喇，隨時改頭換面連影都冇埋呀。

唔好以為啲地方東一度西一度呀，其實公園仔同渭濱城都喺美林，而道風山就喺附近，毛毛建議可以連埋一齊去。

點去：大圍火車站A出口沿大圍道直行至美林邨

余光中曾經喺《文學的沙田》入面寫過「仁者樂山，智者樂水。山水如此，沙田應多智士與仁人」。咁有文采嘅句子，毛毛就唔識寫喇，不過希望呢個特輯，可以將沙田呢個咁有詩意嘅好地方介紹畀大家，無論你係唔係住喺沙田都好，都希望大家可以重新用心欣賞我哋住緊嘅地方。

回帶：沙田十大清新影相位（上）