做人，最緊要係有夢想，小巴，最緊要當然係有膠牌啦。

而呢啲咁有特色風味嘅小巴牌，就係由麥錦生師傅親手提筆，每一個都係佢嘅親生骨肉嚟㗎。

但係，呢個傳統手工藝喺香港已經逐漸式微，為咗令呢門手藝得以傳承，麥師傅喺今年暑假不定期於油麻地嘅工作室舉辦導賞團，內容好豐富而且費用全免，毛毛梗係9衝啦！

麥師傅好詳細咁講解小巴嘅起源同發展，紅van喺1969年合法化，當時只要畀8000蚊政府，就可以有個小巴牌，而到目前為止總共有4350架紅van。

而綠van就喺1973年出現，綠van當時只係做山頂路線，師傅解釋：「因為住半山嘅都係有錢人，而佢哋嘅工人姐姐唔可以坐私家車，所以平時去買餸都係靠綠van代步。」

最原始嘅小巴牌只係一塊普通嘅紙皮，仲係放喺車外面，所以日曬雨淋後好容易就會爛。

喺1984年，小巴由熱狗（14座位，無冷氣）改裝成有冷氣嘅車，所有小巴牌同錢兜都要重新做過，而位於油麻地嘅工作室外，就係八條小巴線嘅停泊處，「咁我喺到做開招牌生意，司機大佬都嚟搵我寫啲膠牌同整啲錢兜。」

當時製作數量驚人，可以話係麥師傅嘅全盛時期。師傅仲話：「開頭有啲司機大佬想慳啲會自己印張紙再拎去過膠就拎嚟用，但係一曬得耐就甩色啦嘛，所以最後佢地都係會幫襯返我。」

膠牌嘅隔籬多數都有一個寫價錢嘅長牌，麥師傅就解釋：「最原始嘅價錢牌其實係傳統中國數目字，後來仲有杭州嘅花碼字傳入咗香港，但由於80年代開始較多菲傭嚟到香港工作，而佢地都唔識睇呢兩種數字，所以最後就改用阿拉伯數字喇。」

「唔知大家有無留意到除咗白色膠牌之外，仲有其他唔同底色嘅膠牌呢？」

原來白色以外嘅膠牌係由其他有勢力人士負責嘅小巴線，一種顏色代表一條路線，如果要揸呢啲路線嘅話，就要先畀入線費，唔畀錢就亂咁揸嘅話好易惹嚟殺身之禍㗎。

導賞團嘅最後，麥師傅即席揮毫，為我哋示範點寫小巴牌，鐵畫銀鉤，兩三下手勢就寫好一個100%香港味道嘅小巴牌，現場嘅朋友仔仲可以揀自己鍾意嘅地方名，又或者人名、句子都得㗎！很想要吧？

咦咦咦？呢塊牌咁熟口面嘅？其實佢就係《那夜凌晨，我坐上旺角開往大埔的紅van》入面嗰塊膠牌，原來戲入面架紅van嘅膠牌同道具都係由麥師傅負責。

麥師傅都係坤哥嘅fan屎？唔係！係前排坤哥開演唱會嘅poster，入面架紅van嘅燈箱布同膠牌都係由麥師傅一手包辦，連坤哥都讚師傅「手字好得！」

最後有一個好消息同壞消息，你想聽邊個先？唉毛毛強行講個壞消息先！因為暑假已經完咗～所以呢個已經係最後一個導賞團嚕。

之不過，麥師傅仍然會不定期喺工作室舉辦唔同嘅活動，亦有機會去唔同嘅市集擺檔，有興趣嘅小巴L就要多啲留意喇。

唔講住喇，毛毛去J下啲小巴膠牌先。

(多謝 巧佳小巴用品 畀毛毛嚟蛇下王)

===============================

毛記專題，不定期上市。

求其交貨，純粹扮工蛇王，唔使期待。

#100毛 #毛記電視