成日見到啲妹豬一去到海邊就話要玩咩飄流瓶遊戲，又話邊個執到佢個樽就係佢嘅真命天子咁樣樣。唉，真係以為自己拍緊愛情片咩，想靠呢啲搵真愛，唔係咁易㗎葉師父！不過最近外國就有個女仔，佢細個放落海嘅飄流瓶，竟然喺21年後畀一個男人執到喎！

雖然佢打開個樽嘅時候，入面張紙條已經溶溶爛爛，但係個電話號碼仍然好清楚，於是個男人即刻打過去，希望可以搵返21年前寫呢張紙嘅事主！可惜一直都打唔通。但係唔緊要，而家科技咁發達，有咩咪擺上網，用人肉搜尋囉！

網民嘅力量果然好強大！經過n咁多個like and share之後，個男人終於成功搵到寄飄流瓶嘅嗰個女人喇！係呀就係相入面嗰個呀！

個女人話呀，佢都唔記得咗點解自己細個會寄飄流瓶，應該都係貪得意，玩下咁囉！估唔到咁樣又可以識多個新朋友，緣份嚟嗰陣真係擋都擋唔住呀！睇嚟毛毛都係時候寄返十幾廿個飄流瓶出去，21年後應該就會有人應我㗎喇，55！

圖片來源、資料來源：stuff.co.nz、Courtney Stevenson