2016年09月02日 星期五
【睇見都飽】447層牛肉嘅漢堡包係咩玩法？
話說頭先毛毛大大啖咁歎緊個兩層孖堡嘅時候，隔籬位女同事竟然話毛毛好大食！Oh my god！兩層都話大份？佢哋真係未見過大尿屙蛇呀！
最近有台灣網民話佢摷返手機啲舊相嚟睇嘅時候，就發現幾年前嘅出土文物！嘩，個漢堡包咁長叫人點食呀？！睇見都飽晒啦，到底係咩玩法？
原來幾年前有間連鎖快餐店搞咗個「無限加層的犇牛堡」活動，唔識讀唔緊要，總之就係好好好好好多多多多多塊漢堡扒咁解。只要加25蚊台幣就可以加一塊㗎喇，即係6個幾港紙就有一塊，媽，好抵食呀……
當年佢阿哥咪就係同班fd子去快餐店挑戰「最長犇牛堡」，使成萬幾蚊（好彩係台幣）加咗447層牛肉囉，佢仲好幫得手咁食咗5塊咁多?～個包成5米咁長，唔知要幾多人先食得晒呢？
400幾層已經夠晒誇張啦，不過再誇啲都仲得呀！當年呢個犇牛堡活動最高紀錄係812層，個包有成9公尺咁長，25.2公斤咁重！聽講有成40個人一齊食，不過佢哋最後都係食咗一半咋。雖然見到咁大個漢堡包係好震撼，不過食唔晒又太大嘥喇，爾康已經好忙㗎喇，畀佢抖下得唔得？
