2016年09月03日 星期六
【毒L識食】原來芝士撈麵加蜜糖係咁正㗎！
由唔知幾時開始，我哋一聽到芝士兩個字就濕晒（個口），無論食乜都要加芝士，炒蛋啦、雞蛋仔啦、雞煲啦、豬仔骨啦，就嚟連涼茶都要加芝士㗎喇！不過毛毛最鐘意都係芝士撈麵，香噴噴嘅公仔麵加埋芝士拉絲，諗起都正呀！今日就一齊試下整甜味芝士撈麵啦！
例牌都係講咗要咩材料先啦，話明「芝士撈麵加蜜糖」，就當然要有一包即食芝士撈麵……同埋蜜糖啦。如果屋企有麻油就更好啦～
芝士撈麵嘅做法，可能大家仲熟過毛毛啦。首先淥熟個麵先，跟住再落調味粉撈撈撈囉。不過都有少少技巧㗎，要香濃，芝士粉梗係要落晒，但由於撈麵啲味會集中啲，所以湯粉落少少至半包就ok。
仲有呀，好多人都會貪方便直接倒包粉落個麵度撈，其實用少少熱水攪勻啲粉先再撈麵嘅話，無論顏色定味道都會勻循好多㗎！
話咁快又到咗高潮一刻，就係落蜜糖喇！大概一羹仔蜜糖已經好夠味㗎喇～
再落少少麻油就更加色香味俱全！
其實個蜜糖芝士撈麵已經完成㗎喇！是咪好簡單呢！不過毛毛都知大家係芝士狂魔，一包仔芝士粉又點滿足到我哋對芝士嘅欲望呢？趁個麵仲熱，落多塊芝士撈撈撈，多一重軟綿綿嘅拉絲口感，正呀！
【毒L識食系列】
