有聽過人哋讀結婚誓詞嘅都知，啲內容離不開都係話自己無論生老病死、富貴貧窮、逆境順境，都會永遠愛護同珍惜對方呀咁。不過今時今日咁係唔夠，結婚誓詞一定要講埋自己會永遠同對方放閃先得！

是咁的，話說噚日有位32歲嘅台灣人妻inbox一位台灣網絡紅人「權志龍」，話自己已經同老公結咗婚三年，仲有個1歲嘅囝囝，但因為老公好少陪佢出席姊妹聚會，加上老公份人又比較低調，好少用facebook，呢幾年都冇乜點tag過佢，搞到班姊妹就以為佢哋夫妻關係唔好，所以咪令到呢位人妻想離婚囉！

咁又係呀！雖然自己個老公要返工賺錢養家啫，但咁都唔代表佢唔使日日喺facebook放閃，等佢可以喺班姊妹面前曬命㗎嘛！你哋話嘞，得班姊妹瘋狂放閃，而佢自己就得個睇字冇得放，公平咩？

不過咁，如果唔係因為老公唔肯放閃，呢位人妻又邊有機會訴苦？邊有機會紅呢？所以拉勻嚟計，其實阿老公都算係完成咗自己作為「呃Like工具」嘅使命嘅，55！

資料來源：網民 權志龍 同意轉載