通常成班fd子出嚟食飯，唔係打邊爐就係放題，貪佢咩都有之餘仲要任食呀嘛！不過世人都係眼闊肚窄嘅，成班fd子咁高興，真係好容易order多咗嘢食，或者一聽到店員話last order就驚死蝕底咁叫一堆嘢食，搞到次次都食剩少少…… 

真係食唔落搞到食剩嘢都冇辦法啦，唯有下次小心啲，食幾多叫幾多啦！但真係估都估唔到，有人會特登食剩成枱食物！台灣有網民話去食日式放題嘅時候，見到隔籬枱嫌舖頭出菜太慢，所以特登叫到成枱都係嘢食，仲要好囂屎咁話「看你們怎麼出」！

食得晒就話啫，呢枱咁寸嘅食客原來係大嘥鬼化身，order完拍下籮柚就走，剩返一大堆啱啱上枱，就準備畀人倒入垃圾桶嘅食物。

店長話知呢枱客人嫌出菜慢，已經話可以延長佢哋嘅用餐時間，但佢哋就唔領情，明知食剩嘢要罰100蚊台幣都照瘋狂order，擺明要玩嘢咁話，連打包都唔打呀。

唉，你估有錢真係可以咁任性咩！有冇諗過一碟食物由生產到煮好送上餐枱，要用幾多能源同人力物力？呢班大嘥食客一定冇，因為佢哋只諗到自己！不滿餐廳出菜慢，都有好多反映意見嘅方法嘅，你睇人哋有霸氣之餘仲幾有家教？

封面圖片、資料來源連結：Wogan Lee、蘇家賢

延伸閱讀：【霸氣意見書】出餐慢到我都畫好圖了