好多時，大家都會用框框「框」起咗呢個世界，「框」起咗人哋，「框」起咗自己。
中環碼頭嘅天橋下面，十一個人演奏十幾種中樂樂器。途人睇嚟並唔覺得呢啲聲音同城市格格不入，好多都企定定拎咗部電話出嚟，一邊聽一邊拍，中樂原來可以咁潮，咁好玩！人嚟，睇咗片先！
《寵物小精靈》主題曲
The A-Players係一隊成軍半年嘅街頭Busking樂隊，喺唔同地方演出過六次。
之所以話佢哋可以顛覆你哋對中樂嘅睇法，唔單止因為佢哋將中樂搬出室外，仲因為佢哋演奏嘅歌，實在太匪而所思喇！
流行曲、動畫主題曲，同埋電影配樂，都可以用自己方式編出嚟，再用中樂演奏。呢啲唔係「溝埋嚟做瀨尿牛丸呀笨」係咩？
《數碼暴龍》主題曲
秒速成團
(左起：Donald－琵琶 阿花－琵琶 Vonnie－古箏 Water－敲擊
右起前排：Jason－二胡 Willie－二胡 Sam－二胡
右起後排：Hohochi－笛子 Snow－笛子 金金－中阮 AQ－大提琴)
瀨尿牛丸嘅誕生，除咗講求有創意同天份外，仲需要一份盲勁。問到佢哋點樣成團，Water同AQ對望之後笑咗一笑。
「真係一秒決定㗎囉！」女笛子手Snow衝口而出，「但係我下一秒就話：『哦，好囉』。」
畀團員視為精神領䄂嘅Water，好平靜咁講述成團經過。
「嗰陣練完學校嘅中樂團，我哋一圍檯食飯，坐喺我對面嘅就係佢(指住AQ)。嗰陣我哋諗緊點樣賣AP啲飛(港大中樂團Annual Performance)，咁我就同佢講：『喂！不如去Busking囉？』」
想做又有人肯一齊，咪去做囉。就係咁簡單、直接，唔使諗太多。
就係咁，The A-Players就喺中環碼頭獻出咗佢哋嘅第一次，為大家演奏數碼暴龍01主題曲《Butter-Fly》。
「喺AP完咗之後，我哋又想留住呢個『有機組合』，所以決定繼續編唔同嘅歌，繼續出去表演。」Water補充。
我快樂 所以你快樂
除咗《Butter-Fly》之外，The A-Players仲有唔少動畫改編作品，好似《忍者亂太郎》、《超人的主題曲》、《百變小櫻》同埋《Pokemon》等等。
至於改編歌曲嘅原因，編曲兼大提琴手AQ好謙咁答：「我哋不斷提醒自己，係自娛㗎咋」。雖然係咁，但望住企喺碼頭聽咁耐嘅大朋友、拍晒手一齊唱嘅小朋友，你就知道呢啲歌絕對唔止自娛咁簡單。Water透露，原來有唔少人聽完都想加入玩埋一份，不過都被婉拒。因為The A-Players只會有十一個人。
「我都唔想大家淨係叫我哋做阿古獸樂團」－－Water
為咗唔想觀眾將佢哋標籤為「動漫歌中樂團」，佢哋喺第一次演出後改編咗幾首新歌，包括：電影《加勒比海盜》配樂、《差一點我們會飛》，以及經典廣東歌《皇后大道東》等等。
佢哋仲會透過Busking留言版同埋Facebook Page收集民意，務求編出更多大家都鍾意嘅中樂歌曲。唔單止咁，佢哋仲希望儲多啲經驗之後，能夠寫出屬於The A-Players嘅流行中樂樂曲。
柴娃娃笑哈哈
十一個人，就算係約出嚟食飯都難啦，何況話練團？團裡面仲要有一半人做緊嘢，一半人讀緊書，啲時間真係難夾到呢⋯咁點樣先可以召集大家出嚟練習呢？唔通要等到集齊七龍珠？
「我哋嘅共識係，唔可以接受自己無練習就演出。」Snow就話，其實出席係大家嘅自我要求，而呢個要求會轉化成動力，推動大家出席練習。
問到團員們柴娃娃出嚟玩音樂有咩感受，琵琶手阿花爆咗一句：「唔係玩㗎，好認真㗎」。毛毛當堂嚇咗一跳，原來一班人好開心咁去做大家都鍾意嘅事，可以係一個好嚴肅、好認真嘅議題。
等價交換
如果做一件自己喜歡嘅事，又完全唔需要付出，呢種叫幻想。但現實往往就係現實。現實，應該同佢哋演奏嘅《鋼之煉金術師》主題曲比較接近，係「等價交換」。要好開心咁去玩中樂，背後一定要含淚付出。
「人係需要成長」－－金金
中阮手金金，原本係一位琵琶手，因為樂團缺少低音部，被Water委派去玩中阮。金金話就話係一位彈撥樂器高手，但係要玩一樣唔熟手嘅樂器，都係一種困難。金金諗起有一次表演彈到錯晒，當刻真係好崩潰。但係事後諗返，佢就當咗呢個係挑戰，係一個比自己進步嘅機會，「唔得咪練囉，練到得為止。其實覺得開心㗎，佢畀啲挑戰我，我係開心㗎。」
係呢個時候，Water又加一把口：「呢一班人特別在遇到困難時，第一步會話：『嘩，好難呀』，但之後個步就會練咗佢。」
唔知呢一種，又係唔係佢哋另類嘅默契呢？
「喺病床嗰幾日，我真係好驚自己玩唔返音樂」－－Water
舊年，Water被醫生發現喺右耳生咗一個良性腫瘤；今年七月，佢就喺醫院進行咗手術。
就喺佢住院期間，佢就決定The A-Players要租個Studio。講起Water嘅病，二胡手Willie就話：「因為佢都係我哋精神領袖咁上下啦⋯⋯(其他團員大叫補充：靈魂人物！)我都驚，如果無咗佢點呢。而家見到佢健在，都好安慰喇。」團員們聽到「健在」都笑到騎騎聲，好似印證咗「挖苦你，先至當你朋友」。
因為腫瘤曾經壓住右耳神經線，所以Water嘅右耳幾乎聽唔到嘢。但係呢個唔係藉口，佢反而為咗增強樂團音樂嘅層次，自己走咗去學爵士鼓。
「如果有一個原因，要我停低，應該係健康。」毛毛真係希望你唔好停低！
「我希望屋企人唔好諗之後咁實際嘅野先啦，船到橋頭自然直呀嘛」－－AQ
港大建築系畢業嘅AQ，放棄咗本來嘅高薪厚職，希望投身音樂工作。唉，點解人生咁老土㗎，呢啲戲碼成日上演嘅⋯⋯
每個父母都望子成龍，AQ爭一步就可以成為一位專業建築師，而家毅然轉行，屋企人點睇？佢承認：「唉，其實仲同屋企人周旋緊。」不過AQ嘅屋企人可以唔駛咁擔心，佢同毛毛講咗，佢自己有個放棄嘅期限㗎，與其阻止佢，令佢他日後悔，不如你哋同毛毛一齊支持佢呀，好唔好呀？
中樂，令十一個被揀中嘅細路相遇。十一樣唔同嘅樂器、十一個唔同嘅故事、十一種唔同嘅困難，十一個人喺奮鬥嘅路上，遇到怪魔，會一齊變大個，會用音樂互相體諒、支持、陪伴。做自己想做嘅嘢係攰㗎，係有壓力㗎，屋企人係未必會支持㗎⋯⋯但係望住身邊呢班人，收咗工、放咗學攰瀨瀨都願意同你練到半夜，你唔會捨得放棄。
「越搏鬥戰意便高企 自信碰跌了又再起／堅決相信 為戰友 我定必勝利！」
(PS: 多謝 The A-Players 畀毛毛嚟蛇下王)
介紹返，今個星期日夜晚七點半，The A-Players將會喺尖沙咀海旁busking呀。如果唔駛返工，毛毛都想去呀⋯⋯
【順手再聽多啲歌】
《百變小櫻Magic Card》主題曲
《鋼之鍊金術師》主題曲 不死傳說
===============================
毛記專題，不定期上市。
求其交貨，純粹扮工蛇王，唔使期待。
#100毛 #毛記電視
