2016年09月15日 星期四
【毒L識食】秋天喇，整兜醉雞翼去野餐就最正
熱咗咁耐，終於一早一晚有啲涼意，有返少少秋天嘅感覺喇。秋天唔凍唔熱，最好就係去郊外親親大自然，或者整啲小食去野餐就最好喇～ 毛毛記得以前去秋季旅行，同學仔都會一人整一兜食物齊齊嚟個野外露出大食會，佢哋都唔係揸流灘㗎，會整咩肉醬意粉、咖喱煲咁，只不過去到郊野公園已經凍晒，成件事fail咗啫…… 所以話，去野餐整咩小食都有技巧㗎，最大嘅原則就係要「擺凍咗食都仲咁好味」！
今日毛毛就教大家整一個好適合拎去野餐嘅小食啦，就係醉雞翼喇！材料有：雞翼、醉雞汁、薑。可能少下廚嘅毒L們都唔知要買幾多份量，毛毛今次買到嘅雞翼一磅有11隻，不過雞翼有大有細，唔係次次數量一樣㗎。
首先將薑去皮，放入水煲一陣，咁就可以辟咗雞翼嘅雪味喇。
跟住落埋雞翼，用中火煮8－10分鐘，記得啲水要蓋過雞翼呀。再落少少鹽或者雞粉調下味就ok。
之後就可以過冷河同埋將雞翼剪開一半，咁會入味好多，同埋方便食好多㗎！愛惜健康嘅朋友仲可以剪埋三角形塊雞皮仔?～
主角出場喇！就係落醉雞汁！雖然一樣都係酒味，但小心唔好落錯斷片酒呀，一陣吳幸美上身就冇人救到你喇。放入雪櫃雪一晚，第二日起身就有醉雞翼食喇yeah！
大功告成！等毛毛計下先，出街食醉雞翼$5一隻，而家自己整真係抵好多呀！Between，啲雞翼咁香，毛毛擔心未去到野餐地點已經忍唔住食晒……
【毒L識食系列】
