老老竇竇，其實毛毛都成日食過期嘢㗎～有時見啲嘢只係過咗期幾日，咪食埋佢囉，費事做大嘥鬼吖嘛！反正啲嘢食點毒，都唔會夠毛毛毒㗎啦……Any肥，最近日本就有個網民竟然癲到連過咗期10年嘅薯片都夠膽食落肚呀！

佢話佢屋企本身就好亂嘅，早幾日無意中就喺呢個異空間入面發現咗包薯片，一打開就見到咁樣樣喇……

嘩發晒霉生晒青苔咁，真係隔住個mon都覺得臭呀！但係呢個網友居然話要將佢成包啪落肚呀！喂他一直在玩命.jpg喎！

係呀呢堆白色珍珠唔係佢啲脷苔嚟，係嗰包過咗期10年嘅堅﹒薯片嚟！佢仲影埋個空嘅包裝袋，有圖有真相咁話喎！

正當大家食住花生等睇個網友肚屙嘅時候，佢又post多張相上網，話大家原來都中晒伏喇！嗰包所謂過期10年嘅薯片，其實係新出嘅萬聖節限定版－黑色法式清湯口味嚟㗎！

雖然一切謎底都已經解開了，但係認真，塊薯片生到咁樣樣乜真係仲有人想食咩……

圖片來源、資料來源：2ch、Calbee カルビー