食咗成個星期月餅，中秋話咁快就過咗喇，剩底一個個孤伶伶嘅月餅盒，擺喺度又嘥位，但個鐵盒實實淨淨咁，扔咗去又好似好浪費，到底點做好呢？古乳有暈「藥箱都變成首飾箱」，其實花啲心思，月餅盒都可以變做首飾盒嘅！

最近毛毛喺一個外國網站睇到有人教整D.I.Y.首飾盒，有好嘢梗係要開心些牙畀大家啦，所以毛毛就跟住做咗一次，睇下係咪真係咁易整喇～事不宜遲，講下需要咩材料先：碎布／月餅盒／牙簽／爛臭毛巾。如果冇月餅盒，當然都可以用你鍾意嘅鐵盒仔或者膠盒仔啦。

首先，將唔要嘅爛臭毛巾依住鐵盒嘅闊度，剪成一塊塊。

跟住就將剪好嘅毛巾捲成一條條，整整齊齊咁排入鐵盒裡面。

呢個時候，一盆熱辣辣嘅豬腸粉就完成喇！加埋豉油麻醬甜醬就食得！灑多幾粒芝麻?呀唔該！

將碎布鋪喺最面，再攝啲牙簽入腸粉之間。記得小心，唔好整亂啲腸粉呀。

完成喇！只係用咗十分鐘，就整好一個首飾盒喇！自己落手D.I.Y.，其實唔難！

呢個時候，就到咗最重要一步，就係各位妹豬可以開始叫男朋友送飾物畀你喇，唔係邊有嘢擺入個咁靚嘅首飾盒呀？

參考網站：pinterest